शृंगार मराठीचा

आजच्या मराठी भाषादिनी वाचलेली ही कविता.. मराठी भाषेचे लावण्य, वैभव ह्यात खूप सुंदरतेने वर्णिले आहे. 

कवी - अज्ञात 

अनुस्वारी शुभकुंकुम ते
भाळी सौदामिनी |             

प्रश्नचिन्ही डुलती झुमके
सुंदर तव कानी |   

नाकावरती स्वल्पविरामी
शोभे तव नथनी |             

काना-काना गुंफुनी माला
खुलवी तुज मानिनी |      

वेलांटीचा पदर शोभे
तुझीया माथ्याला |                

मात्रांचा मग सूवर्णचाफा
वेणीवर माळला |         
   
उद्गाराचा तो गे छल्ला
लटके कमरेला |                  

अवतरणांच्या बटा
मनोहर भावती चेहर्‍याला |    
     
उकाराचे पैंजण झुमझुम
पदकमलांच्यावरी |        

पूर्णविरामी तिलोत्तम तो
शोभे गालावरी ॥